Qaacidada '18-40-60'

 

QAACIDADA 18-40-60

Qaacidadan waxaa buuggiisa mabaadi’da guusha ku sheegay Jack Canfield. Qaacidadani  si kooban waxa ay ka warramaysaa arrin aad muhiim u ah, taas oo ah marka aad ku jirto da’da siddeed-iyo-toban jir waxa aad danaysaa oo macna weyn kuu sameeya ra’yiga dadka kale, waxa aad u dheg-raaricisaa waxa ay kaa leeyihiin, waxa aadna ka welweshaa dareen noocee ah ayay dadku kaa qabaan.

  Marka aad gaadho da’da afartan jirna gebi ahaanba ma danaynaysid waxa ay dadku kaa leeyihiin, ra’yiga ay kaa qaadanayaanna miisaan kuuguma fahiyo, ammaantooda iyo dhaliishooda toona wax weyn kugu biirin mayso. Balse marka aad gaadho da’da lixdan, waxa aad ogaanaysaa xaqiiqo anfariir leh, taas oo ah, maba jiro noloshan cid kuu danaynaysay heerka aad weligaa u malayn jirtay in ay arrintu gaadhsiisan tahay.

Sidaas awgeed, ha sugin dadku waxa ay ku odhanayaan, same waxa ay waajibka tahay in aad samayso, mowqifkaaga nololeedna muraajacee, kaddibna geeddiga horay u wad, iska illow kuwa ku xagxaganaya, ku dhaliilaya, si yasmo lehna farta kuugu soo fiiqaya. Waa sax, dhaliishoodu haddii ay sax tahay qaado oo ka faa’iidayso, balse ha u oggolaan in ay dhabarka kaa fuulaan “qofna ma awoodo in uu dhabarkaaga fuulo, ilaa in aad u foorarsato mooyee.” –Marthin Luther

Haddii aad leedahay han sare aadna rabto in aad figta gaadho, waayi maysid dhalleecayn iyo wax-ka-sheeg, ogsoonow badanaa dadka wax laga sheego waa dadka tayada leh, ee ka soo dhex mudho bulshooyinkooda. Haddii aad rabto in aan lagu dhaliilin oo lagu dhalleecayn, waxba ha odhan, waxba ha samayn, waxbana ha noqon ee gurigaaga iska joog.

Imaamu Qazaali ayaa laga sheegay: “aniga iyo dadka maxaa na kala galay. Caloosha hooyaday keligey ayaa ku jiray, dunida keligey ayaa u soo baxay, keligey ayaa dhiman doona, keligey ayaa qabriga la gelin doonaa, qabrigayga keligey ayaa laga soo saari doonaa, keligeyna waa la I xisaabin doonaa, maxaa na kala galay aniga iyo dadka.”

                                               WQ: Cabdikariin Maxye