Sirta u Qabashada Hawlo Yaryar si Weyn

 

Sirta u qabashada hawlo yaryar si weyn

Rasuulka (NNKHA) waxa uu leeyahay Xaddiis macnihiisu yahay: Alle hawlaha la qabto waxa uu ugu jecelyahay kuwa la joogteeyo haba yaraadeene. Taasi waa sir weyn oo farta inoogu fiiqaysa in haddii aynu hawl u qabano si joogto ah ay ugu dambayn dhalanayaan natiijooyin lala amakaago!

    Haddii aan akhriska tusaale ugu soo qaadanno, bal ka warran muddo sannad ah haddii aad maalin walba akhrido 10 warqadood.? 10 ku dhufo 30 maalmood, waa 300 oo bog bishii. 300×12 bilood=3600 oo bog. Cajiib! 10 bog waqti intee le’eg ayay maalinkii innaga qaadan karysaa? Aan badinno oo dhahno soddon daqiiqo. Bal sawiro mowduuca aad 3600 oo bog ka akhrido heerkee ayaad ka joogi kartaa? Waxa aad majaalkaas ku noqon karaysaa khabiir, adiga ayaana wax lagaa weydiin doonaa.

Tusaale kale, Quraanka haddii aad maalintii qaybto 5 aayadood, intee ayaad aayadood ayaad bishii iyo sannadkii qaybi kartaa? 5×30=150 aayadood ayaad bishii qaybtay. Bal ka warran sannadkiina, 12×150=1800 oo aayadood ayaad sannadkii qaybtay. Tirada aayadaha Quraanku waa 6236 aayadood, iyada oo ay jiraan aragtiyo kale oo ku saabsan tirada aayadaha Quraaka.  Waxa ay ka dhigan tahay in aad Quraanka ku xifdiyo karto saddex sano iyo dhawr bilood. Hadda maalintii waxa aynu qaybnay 5 aayadood, shan aayadood ma waqti badan ayay qaadanaysaa in la qaybo? Adiga ayaan kuu dhaafayaa jawaabtaada, iyo inta ay kaa qaadan karto.

   Tusaalayaal kale miyaad u baahan tahay? Intaasi waa iftiimin e adiga ayay tahay in aadan yaraysan hawlna. Fikrad weyn iyo arrin weyn dooro, maalinba qurub gooso, maalinba waax la fuq, ugu dambayn adiga oo figta sare ka jooga ayaad arki doontaa idamba Eebbe. Sirtu waa maxay? Sirtu waa joogtaynta. Ma jiro wax lamid ah joogtaynta hawl muhiim ah qabashadeeda. “Joogtee weligaa, ma jirto dunidan wax geli kara boooska joogtaynta e. mawhibada keligeed innaguma filna, garaadbadnaanta keligeedna innaguma filna, waxbarasho keligeedna innaguma filna, balse joogtaynta iyo go’aanka ayaa awooda in ay sameeyaan wax kasta.” – Ray Kroc

Bilaw, wad, baaqashada hawshaada ee maalin iyo laba oo ay culaysyada noloshu ku hor istaageen yaanay naftu kuu sheegin in aad hawshaa ku guuldarraysatay, adigu ma tihid mishiin e, Aadame ayaad tahay, waad kufi oo kici, laakiin ha sii fadhin. Rag waa kii kufa, ee kaca, kabma ee kaalintii gala.

Tooruhu wuxuu kugu ridaa, tubaha waaweyne 

Tallaabada yar baa lagu bartaa, tawda booddada e   - Dhoodaan

W/Q: Cabdikariin Maxye