Salaadda iyo Isbeddelka Nolosha

 

Salaadda iyo isbeddelka nolosha

Salaaddu waa tiir kamid ah tiirarka islaamka, waana tiirka labaad. Miisaanka ay leedahay waxa ina tusinaya in ay tahay tiirka labaad marka laga yimaaddo Ashahaadataynka. Hadda u fiirso waa irridda labaad marka laga soo tiriyo in qofku Eebbe rumeeyo. Salaadda, maanta/caawa isoogala hadli maynno qaab muxaadiro ah, oo ayu waajibnimadeeda, fadligeeda, qofka ka taga iyo ciqaabta loo yaboohay iyo arrimo lamid ah ka hadlaynno, waxa aynu ka istaagaynaa dhankaas iyo xidhiidhka ka dhexeeya salaadda iyo isbeddelka nolosha ruuxa Muslinka ah.

“إن الله لا يغيّر ما بقومٍ حتى يغيروا ما بأنفسهم” [الرعد:11

Eebbe waxa uu leeyahay: Alle ma beddelo qolo ilaa ay nafohooda beddelaan. Qofka raba in uu ummad beddelo ugu horrayn waa in uu isagu isbeddelaa, qofka raba in uu isbeddelana waa in uu salaaddiisa dib ugu noqdaa. Qofka raba in uu isbeddelo waxa uu u baahanyahay awood iyo tamar uu isku beddelo, mana jirto awood lamid ah ta lagu helo la xidhiidhka adag ee Alle.

Aynu iska illowno oo ka tanaasulno dhaqanka odhanaya: salaad baan iska ridayaa, aanna qaadanno dhaqankii Rasuulka ee uu Bilaal ku odhan jiray: Bilaalow noogu raaxee salaadda. Haddii aad waajibnimadeeda uun iska riddo miyay la dhadhan iyo waxtar noqonaysa qof tiisa ku raaxaystay, khushuucay, kuna taddaburay Quraanka?

Marka uu Alle leeyahay:

“قَدْ أَفْلَحَ الْمُؤْمِنُون* الَّذِينَ هُمْ فِي صَلاتِهِمْ خَاشِعُونَ”

Xaqiiqdii Mu’miniintu waa ay guulaysteen, kuwaas oo ku khushuuca salaaddooda. salaadda keensanaysa guushu waa mid lagu khushuucay, laguna taddubaray Quraanka. Oo miyaad garanaysaa guul ka weyn in qofi Naar ka badbaado Jannana galo?!

Salaadda inta aan la gelin Aadaan ayaa ka horreeya, weli ma dhadhansatay mana ku fekertay macnaha: حي على الصلاة حي على الفلاح, macnaha ku duugani waxa uu yahay marka aad salaadda u timaaddaan, si sax ahna u gudataan ayaad helaysaan guusha aad rabtaan. Haddaba waa su’aal e: sidee ayaa uu u guulaysan karaa qof aan ajiibin Aadaanku, lana iman salaaddii lagu waajib yeelay?!