Maalgashiga Nafta

Maalgashiga Nafta

Waxa aynu maqalnaa noocyo kala duwan oo maalgashiyo ah sida; maalgashiga beeraha, maalgashiga guryaha iyo maalgashiga dhulka. Waxaa laga yaabaa in aad la yaabtay marka aad maqashay maalgashiga nafta. Naftu waa sida deegaan hodan ah oo carrosan ah. Haddii aad maalgashato oo aad ku beerato midho aad si xeeldheeri ku jirto u xulatay, waxa aad la amakaagi doontaa midhaha aad ka guran doonto. Sideedaba maalgashiga naftu kuma yimaaddo khasab iyo qoorqabad, waa go’aan iyo rabitaan gudaha ka yimaaddda.

    Hadddii aad u malaynayso dadka badan ee guulaha ka xaqiijiyay dhinacyada kala duwan ee nolosha, in ay si kedis iyo lamafilaan ah ku gaadheen, waad ku khaldan tahay aragtidaas. Nolosha ma jirto wax bilaash ah. Wax qiima leh haddaad rabto waa in aad bixisaa wax qiima leh. Edison markii la weydiiyay cabqariyadda, waxa uu ku tilmaamay: in caqbqariyaddu boqolkiiba hal (1%) ay tahay ilhaamin, 99% kalana ay tahay dhidid iyo halgan. “Ma jirto qado bilaash ah” sida ay dhaqaalayahannadu yidhaahdaan.

Qofka doonaya in uu naftiisa maalgashto waa qof raba in uu isbeddelo, qofka rabitaankaas iyo dadaal la yimaaddana Alle ma dayici doono.

    Isbeddelka ugu weyni waa in aan wax ka beddelno qaabfekerkeenna iyo aragtida aan nolosha ka haysanno. Waa in aan ogsoonaanaa in xidhiidh qotodheeri ka dhexeeyo fekerka, ficilka iyo natiijada. Si aanu maalgashiga naftu u noqon wax laga gaadhi waayo ujeeddooyinkii laga lahaa, aan raacno talooyinkan intii aan ka awoodno.

1. Maalin kasta cusboonaysii xidhiidhka aad Alle la leedahay. Ilaali waajibaadyada kala duwan ee uu Alle ku faray. Quraanka maalin wallba wax ka akhri hadday doonto haba yaraatee. Yeelo wardi joogto ah. Maalgashi ka weyn ma jiro in qofku uu qabto camalkii uu Naarna kaga babdbaadi lahaa Jannana geyn lahaa.

2. Maalin kasta wax ka akhri buug faa’iido leh. Akhrisku waxa uu nolosheenna u furaa irrrido aan si kale iyo sabab kale toona u furmeen. Sidaas darteed, yaanay ku soo marin maalin/isbuuc aadan waxba akhrin.

3. Bil kasta isku day in aad ka qayb gasho siminnaar ama muxaadaro. Suurtagal ma aha/way adag tahay in aad bil walba siminnaar baahiyahaaga daboolaya in aad hesho, balse intarnetka ayaa wax walba fududeeyay oo aad ka helaysaa mawduuc walba isaga oo diyaarsan bilaashan ah. Ka faa’iidayso.

4. Bil kasta ama labadii bilood ee kasta isku day in aad koorso cusub barato. Mar kasta oo ay badanyihiin shabagyada aad ku soo kalluumaysan karto waa mar kasta oo ay kordhayso baahida laguu qabayaa.

5. Baro dad tayo leh lana samayso xidhiidho midha-dhala. Hal xidhiidh ayaa laga yaabaa in uu noloshaada u beddelo dhanka togan. Ogsoonow in aynu joogno caalamka xidhiidhada, xidhiidhada togan ee tayada lihina ay ka qiima badanyihiin hanta.

Waxa ay dhahaaan: your network is your net worth.

 Taas oo macneheedu yahay: shabakadda iyo cilaaqaadka aad leedahay waa hantidaada saafiga ah. Awoodda iyo saamaynta aad yeelan karto waxaa door weyn ka qaadan kara saaxiibbo tayo iyo qiima leh.

6. Maalgasho waqtigaaga iyo si guud dhallinyarannimadaada. Qabo inta aad yartahay waxa ugu fiican ee aad qaban karto. Haddii ay ku soo marto maalin ama isbuuc aadan wax cusubb korodhsan naftaada canaano, go’aansana in aysan mar dambe dhicin.  Ogsoonow inta aad adigu waqtigaaga luminayso in ay jiraan dadyaw kale oo isla waqtigan ka faa’iidaysanaya. Arrintu ma aha waqtigu ma soconayaa? Waxaa taas ka sii muhiimsan su’aasha ah: waqtigaygu wax noocee ah ayuu ku baxayaa?

Ragse laqan fariiduu noqdaa, amase waa liide

-Dhoodaan

 

 

WQ: Cabdikariin Maxye