“ABCDE” Fanka Kala Horraysiinta Hawlaha

              “ABCDE” Fanka Kala Horraysiinta Hawlaha

“Xeerka koowaad ee guushu waa diirad-saaryada. In aad u weeciso awoodahaaga oo dhan hal dhinac, in aad u jihaysato halkaas dhinac, adiga oo aan milicsanayn midig iyo bidix toona.” – William Mathews

 

Mar kasta oo aad fikir geliso qorshaynta iyo dejinta hawluhu sida ay u kala horraynayaan, ka hor inta aadan bilaabin, waa mar kasta oo ay muhiimad badan yeelanayaan hawlaha aad qaban doontid, iyo in aad si dhakhso ah u qabatid isla jeerka aad bilawdid.

Habka ABCDE waa farsamo awood iyo waxtar leh marka la dejinayo hawluhu sida ay u kala mudanyihiin, si maalinle ah ayaadna u adeegsan kartaa. Farsamadani waa mid fudud kaana dhigaysa mid saamayn ku leh bulshadiisa iyo majaalkiisaba.

Farsamadani sidan ayay u shaqaysaa. Waxa aad ku bilaabaysaa liis ka kooban wax kasta oo aad rabto in aad qabato maalinnimada soo food leh.

Ku dul feker warqadda. Ka dib waxa aad ka kala dhigtaa liiskii aad qortay A,B,C,D,E ka hor inta aadan bilaabin shaqada ugu horraysa.

A- Waxa lagu qeexaa in ay tahay shayga ugu muhiimsan, shay ay khasab tahay in aad samayso. Tani waa shaqada kuu yeelaysa saamaynta dhabta ah ee togan ama taban haddii aad samayso ama aad ku guuldarraysato in aad samayso. Haddii ay kuu yaallaan wax ka badan hal shaqo oo galaya khaanadda A, waxa aad mudnaanta u kala siin kartaa shaqooyinkan adiga oo qoraya “A-1”, “A-2”, “A-3” iyo si lamid ah, kuna hor qoraya shay kasta hortiisa. Shaqadaada A-1 waa ta kuugu weyn, kuuguna muhiimsan.

B- Hawlaha ku jira khaanadda B waxaa lagu qeexaa in ay yihiin shaqo ay khasab tahay in aad samayso. Balse waxa ay leedahay natiijooyin dhexdhexaad ah. Shaqooyinka ku jira khaanadda B way ka mudnaan yaryihiin kuwii A. qaacidadu waxa ay tahay waa in aadan qaban shaqooyinka B adiga oo aan dhammayn shaqooyinkii A-da ahaa.

C- Shaqooyinka khaanadda C waxaa lagu qeexaa shaqooyin ay iska fiicnaan lahayd in la sameeyo balse aan gebi ahaanba lahayn wax saamayn ah, haddii aad qabato iyo haddii aadan qaban labadaba.

D- Shaqooyinka khaanadda D waxaa lagu tilmaamaa in ay yihiin waxyaalaha aad u wakiilan karto cid kale. Xeerku waxa uu yahay waa in aad u wakiilato shaqo kasta oo uu qof kale kuugu qaban karo sidii aad rabtay, kalsoonina aad ku qabto qofkaas. Markaa kaddib waxa aad waqti dheeri ah u heli doontaa shaqooyinkii ku jiray khaanadda A, kuwaas oo aad adiga oo keli ah qabsan karaysay.

E- Hawlaha E waxaa lagu qeexaa in ay yihiin waxyaalo aad tirtiri karto gebi ahaanba, aanna yeelanayn wax isbeddel ah oo taban ama togan. Ogow haddii aad waqti badan iskaga lumiso shaqooyinka E waxa aad lumisay shaqooyin mudnaan lahaa oo ku jiray khaanadda A, kuwaas oo noloshaada isbeddel weyn ku keeni lahaa.

Maaddaama oo aad shaqooyinkaagii ku dabbaqday qaacidada ABCDE, waxa aad noqonaysaa qof abaabulan oo aan isku dhex daadsanayn, una diyaar ah in uu qabto shaqooyin aad muhiim ah saamayntoodana leh. In aad xeerkan ku taagnaato waa midda kaa dhigaysa qof ka duwan badiba dadka ku hareeraysan.